.: ذكرى الماضي :.



على ذكرى الزمان اللي مضى لي هل دمع العين = تذكـرت السنيـن الأولـه والدمـع همَّـالـي
يلج بداخلي ذكرى ربوعـي والزمـان الزيـن = وفكري من هموم القلب وصدوف الزمن خالي
يورَّى في عيوني مجلس الشايب وبيت الطيـن = مداهيل الرجال اللي لهـم بالطيـب منزالـي
مجالسهم مجالس للشجاعـة والكـرم والديـن = تنومس راعي الطالـة وتغبـن كـل بطالـي
ماهي مثل المجالس ذا الزمان اللي قبوله شيـن = مغير السالفه وسط السياسة وأسهـم المالـي
أخذت بسجتي ساعة بعد مافقت مـدري ويـن = زواني هم قلبي عقـب جيـت الـدار بلحالـي
غدت عيد النخل صرعا وطاح السور والبرجين = تصدع وانهدم جنبه وزرنـوق اللـزا مالـي
ولاباقي سوا السدرة والأثله تبكـي الماضيـن = مع البركة وبرجستن حديـد مصـدي بالـي
تكلم عن زمان راح يوم المد عـن عشريـن = تريد ابه الثنا مادورت بـه قـرش وريالـي
زمان راح مايمكـن يعـود ودق فيـه البيـن = أنا مالي سوا الذكرى ولوهـي كـدرت حالـي
الايادار ويـن أهـل الكـرم واللابـة الوافيـن ؟!! = صورهم في عيوني ويــن ماوجهـت تبرالـي
الاياوقتنا اللي سم حالي فـوق عشـر سنيـن = على فقد النشاما كـل غالـي يتبعـه غالـي
بكيناهـم بدمـع حـرق الجفنيـن والخـديـن = ولوكان البكا مـارد لـي عمـي ولاخالـي
أنا وقفت من فوق القبر عقب العصر ياحسيـن = علامات الحزن فوق الوجيـه وصـرت مهتالـي
أسولف مع هجوسي وأنشد الخاطر بحين وحين = زمان أول لحقتـه صـدق ولا هـو يورالـي
بكيناهم وحنـا نـدري إنـا عقبهـم ماشيـن = تـرى دنيـا الفنـا ميقـاف منـزال وترحالـي
الا يالايمـي خـل الملامـه واتـرك التخميـن = أنا شاعر وأعبر عـن شعـور دق فـي بالـي